Nattirhiurtuq
Nattiit anguniarvigivaktangit ukiugaalungmi Inuinnainnut, anngutikhatuanguuvlutik niqikhautikhanullu inuudjutauhimavaktangillu pitquhirigamik. Auyami, qayakkut, unaaqaqhutik nattiqhiurpaktut. Ukiiliraangata Inuinnait naulirpakhutik taryurmi hikumi nattiliqivakhutik. Taimaa pitquhiqaqhutik anguniaqtut nivakpaktut nattiup agluhiuqhutik hikumi, ilakni ilivlugu (mikiyunnuaq tingmiap mitqua anngutikhap mitquanigluniit) nalunaitkutiqarivaktangit nattiq qagligaangamik, nippaqhutik utaqqivlutik – ilaani qaffinik ublunganit - naulingnahuaraangat anngutit qaanganungaraangat aniqhaarialigaangamik. Nattirtaraangamik imariktumik tunivlugu nattiq, anguniaqtup ilaiyarpagait tuputarmik aunga kuvilaiyaqhimavakhutik (qayuliurtauvakhugit), quviahugpiaqhutik anngutikhaqhiurtaarangat ilamingnut angilrauvakhutik. Pitquhituanguugamik, Inuinnait tamatkiqhugit nattiup niqait hauniillu aturpagait. Niqait aungalu niriyauvakhugit, amia haluktauvakhutik miqhurtauvakhutiglu annuraaliurhutik tupiliurhutiglu, hauniit anngutikhaliurpakhutik, nutaqqanut ulapqiuyaliurtauvakhutiglu. Ukiumilu, tamaat qullikhait uqquuhutikhanullu atuliqpagaitnattiup uqhuanit uumingat qulliup uyaralingnit qullianit.
